وہاب ریاض نے سالانہ سپورٹس کیلنڈر 25-2024ء کا اعلان کردیا
لاہور (اُردو پوائنٹ اخبارتازہ ترین - اے پی پی۔ 18 دسمبر2023ء) وزیر اعلی پنجاب کے مشیر برائے کھیل وہاب ریاض نے ڈائریکٹر جنرل سپورٹس ڈاکٹر آصف طفیل کے ہمراہ نیشنل ہاکی سٹیڈیم میں سالانہ سپورٹس کیلنڈر 25-2024ء کا اعلان کردیا ہے۔ پیر کو پریس کانفرنس کے دوران مشیرکھیل پنجاب وہا ب ریاض نے کہا کہ سالانہ سپورٹس کیلنڈر 25-2024ء کے تحت رستم پنجاب دنگل کروایا جائے گا،جس کی انعامی رقم40 لاکھ روپے ہوگی،پنجاب کے تیز ترین ایتھلیٹ کے مقابلے بھی کروائے جائیں گے،جنوری میں ونٹر سپورٹس چیمپئن شپ کرائی جائے گی جس میں 6 گیمزکے مقابلے ہوں گے،جس کی انعامی رقم کے طور پر ایک کروڑ 65 لاکھ روپے دیئے جائیں گے، 25 دسمبر کو قائداعظم ڈے کے موقع پرہاکی اولمپئن اور قومی ہا کی ٹیم کے درمیان ہاکی میچ کروایا جائے گا۔ وزیراعلی پنجاب کے مشیر برائے کھیل وہاب ریاض نے مزید کہا کہ پنجاب کی تاریخ میں پہلی مرتبہ 90 کھلاڑیوں کو ڈائمنڈ، گولڈ اور سلور کیٹگریز میں بالترتیب 70ہزار،50 ہزار اور30ہزار روپے ایک سال کیلئے بطور اعزازیہ دیئے جائیں گے جبکہ ٹیلنٹ ہنٹ انڈر 16پروگرام کے تحت اب تک 6 گیمز کے ایونٹس ہوچکے ہیں،ان گیمز سے صوبائی سطح پر منتخب ہونے والے 270 کھلاڑیوں کو 10ہزار روپے ماہانہ اعزازیہ دیا جائے گا،پہلے مرحلے میں دو کیٹگریز انڈر16 اور پروفیشنل کو منتخب کیا گیا ہے۔سپورٹس بورڈ پنجاب نے 18گیمز کو منتخب کیا ہے جس کی18 ٹیمیں بنا ئی جائیں گی اور اگلی نیشنل گیمز میں ہماری ٹیمیں بہترین پرفارمنس پیش کریں گی۔وہاب ریاض نے مزید کہا ہے کہ کوچز کی صلاحیتوں کو بڑھانے کیلئے سپورٹس بورڈ پنجاب پہلی مرتبہ پنجاب انسٹی ٹیوٹ آف سپورٹس سائنسز قائم کردیا ہے جس کا پہلا بیج تربیت حاصل کرچکا ہے۔ڈائریکٹرجنرل سپورٹس پنجاب ڈاکٹر آصف طفیل نے ایک سوال کے جواب میں کہا کہ پنجاب کی تاریخ میں پہلی مرتبہ سپورٹس کلبزکو رجسٹرڈ کیا جا رہا ہے اور اب تک 5000 سے زائد درخواستیں رجسٹریشن کیلئے موصول ہوچکی ہیں،ہمارا مقصد سپورٹس کا فروغ ہے تا کہ گراس روٹ لیول سے سپورٹس ترقی کر ے،اس حوالے سے کلبز رجسٹریشن کی جا رہی ہے،اسی طرح پنجاب انسٹی ٹیوٹ آ ف سپورٹس سائنسز میں کوچز کو پہلی مرتبہ جدید تربیت دی جارہی ہے،ان کو باقاعدہ سرٹیفکیٹس دئیے جائیں گے، پنجاب انسٹی ٹیوٹ آ ف سپورٹس سائنسز میں ایس این ای بھیج کر سٹاف کو بھرتی کیا جائے گا۔ڈی جی سپورٹس پنجاب ڈاکٹر آصف طفیل نے مزید کہا ہے کہ کھلاڑیوں کو انعامات اور اعزازیہ دینے کیلئے 2 ارب روپے کی رقم سے انڈومنٹ فنڈ منظورہوچکا ہے جس سے ہرماہ ایک کروڑ ساٹھ لاکھ روپے کی رقم ہمیں ملے گی جو کھلاڑیوں کیلئے ہوگی،ایک اور سوال کے جواب میں ڈی جی سپورٹس نے کہا ہے کہ ان گیمز میں ہر کھلاڑی حصہ لے سکتا ہے اور ڈیپارٹمنٹ کے کھلاڑی ڈائمنڈ، گولڈ اور سلور کیٹیگری میں منتخب ہوتے ہیں تو انہیں اپنا ڈیپارٹمنٹ چھوڑنا ہوگا۔
ایک تبصرہ شائع کریں